خسرتيني

[center]أنا ماشفت نفسي يوم لأني منخلق من طين
ولو اسمي وصل عالي بظل اللي عرفتيني
ولكن للأسف هانت ليالينا بغمضة عين
وعلى الفرقا بأسبابك نعم أنتي جبرتيني
توصيتي بطعناتي وقبل ماتنزف السكين
وقبل لاالفظ أنفاسي على نفسي توصيني!!
دخيلك قلبي الوافي لاتخلينه ولاتطرين
وراس اللي تحبينه تصدي عن مدى عيني
وصلتي حق نهاياتي وش اللي بس بقا تنهين
على ماأظن ماباقي ولاحاجه تحس فيني
مدام إنك تحبيني وبنفس الوقت ماتوفين
ومادام إنك وفيتي له وبنفس الوقت خنتيني
وش اللي بس تحسينه إذا كنتي تحسين
تحبيني وتحبينه.. تحبينه وتحبيني
حضنتي قلبي ونمتي وعلى صوتي أنا تصحين
وإلا منك تمللتي تحضنينه وتنسيني
محال يصير في الدنيا بشر في داخله قلبين
تبينه بقلب وفي قلبك بعد قلب يناديني
أنا ماأبيك لو إنك على الفرقا دهر تبكين
صعب أرضى بنزواتك لو حتى بغيتيني
ثلاث سنين أو أربع وكاد إنها كثير سنين
بعد هذا العمر كله على أيامي صدمتيني
بعد لاتنطقي بكلمه رجيتك أسكتي تكفين
أخاف إنك إن تكلمتي خطأ باسمه تسميني
وإذا مره ذكرتيني مع الأيام أبي تنسين
ويبقى لك مثل ذكرى جميله لاذكرتيني
كثير اللي يتمنونك وأكيد إنك تبين تلقين
وإنسي يوم ماأنتي تمنيتي ولقيتيني
أنا وش جابني لدربك أنا وين وغرامك وين
أنا أكبر من عيوبك وعيب إنك عرفتيني
وإنسي إنك ذبحتيني وأمانه أدفني السكين
وعلى قبري بدال اسمي أبي كلمة خسرتيني